1 THUHMA
Unau, “Chatuan Daih Thil Hlu,” chu eng nge i hria em? He thu hi Billy Grahama ziak, a rem dan anga lehlin a ni.
2. CHANGTHLAN :- Sam 49: 8
” An nun tlanna man tur chu a to em a, tuma pek tlak rual a ni lo.” ( Mizo- English Parallel Bible)
3. A CHHUNG THU
Scottish preacher, John Harper-a kha AD 1912 kuma Titanic lawnga chuang zingah khan a lo tel ve a. Lawng a pil khan, thing bunga inham tang tlangval pakhat kiangah a thleng a. Harper-a chuan,”Tlangval, chhandam i ni tawh em?” tiin a zawt a.
Tlangval chuan, “La ni lo,” tiin a chhang.
Tui fawnin an pahnih chu a tithen a. Rei vak lovah chuan in be phakin an awm leh ta a, Harper-a chuan tlangval chu a au leh a, “I thlarau kha Pathianah a thlamuang tawh em?” tiin.
Tlangval chuan, “Thlamuang rih lo,” tiin a chhang a.
Tuifawn chuan John Harper-a chu a khuh a, an inhmu leh thei tawh lo. Nimahsela, tlangval bengah chuan, “Chhandam i ni tawh em?” tih zawhna tawngkam kha a cham reng a. Hapta kar hnih hnuah, New York khawpuia thalai inkhawmnaah lo ding chhuakin a chanchin a sawi a, a testimony chu, “Kei hi John Harper- a rawngbawlna hmanga piangthar hnuhnung ber ka ni,” tih hi. Lalpa hming fakin awm rawh se.
Thlarau tlan nana man pek hi a tam em avangin thlarau chhandamna hi a hlu tak zet a ni. John Harper- a khan tuifinriatah a hun tawp dawn tep thleng khan, thlarau chhandamna hna ( soul winning ministry) kha a thawk zel a ni. Chumi avang chuan, tlangval khan a thlarau tan chatuan nunna hlu chu a chhar chhuak ve ta kha a ni, Haleluiah!
Zawlnei Isaia pawhin heti hian a lo sawi kha,
“Mi suaksual chuan a awm dan chu bansan sela, mi fel lo chuan a ngaihtuahte chu bansan rawh se. LALPA hnenah kir leh rawh se, anin a ngaidam nasa khawp dawn si a.” ( Isaia 55:7) tiin.
4. TLANGKAWMNA
Unau duh tak, a chunga thawnthu khi i chhiarin, Pathianin i rilruah khan eng thu nge a sawi le? Tuna i dinhmunah khan, tlangval khi nge i nih a, John Harper- a?
Chhiartu zawng zawngte tan Lalpan a thu malsawm rawh se.
( Amen)
