THUHMA
Unau, rei lo te chauh daih khawvel thil nge i buaipui a, chatuan daih Pathian thu? Kan hnung Pathianni, August 18, 2024 khan, “Bible Sunday” kha kan hmang zo hlim a ni a, sermon kaih tawi kan han tar chhuak a ni.
Hlobet chu a vuai a, a par chu a chuai thin, kan Pathian thu erawh chu chatuanin a awm reng ang. ( Isaia 40:8)
A CHHUNG THU
Chatuan daih Pathian thu hlu, hmangaihtu Pathianin a hmangaih fate hnena a hmangaih lehkhathawn hi, Bible Sunday- ah hian kan puang thin a; kan puang zel ang a, dam chhung pawhin puang ila, kan puang zo seng dawn lo a ni. Tun tumah hian Bible Sunday thuchah (7) tawi te tein tarlang ila.
1. Hebrai, Greek leh Latin tawng pawh thiam kher tul lovin, English tawng pawh thiam lo mah ila, keimahni pianpui tawng, Mizo tawng ngeia chhiar tur Holy Bible, Thuthlung Hlui leh Thuthlung Thar bu pum min pek avangin kan Pathian hming fakin awm rawh se. Mary Jon-i anga Bible ngaina tak zettu ni turin Lalpa hnenah i dil thin ang u.
2. Pathian thawkkhum, Pathian thunung ziakna Bible hian dotu tam tak a lo nei tawh a, amaherawhchu Pathian ngeiin a humhim tlat a ni.
( Matthaia 24:35)
3. A tira awm Thu kha Pathian a ni a, tisaah lo changin, khawngaih leh thutakin a khat. A thu infinkhawm chu thutak a ni. Lalpa hming fakin awm rawh se.
( Johana 1:1, 14; Sam 119:160 )
4. Pathian Thu chu a nung, thil a tithei, tinungtu thlarau pawh a ni. ( Hebrai 4:12; Johana 6:63 ) Suala tlu tawh mihringte Lal Isua vanga chhandam kan nih leh thu min hrilh. ( Johana 3:16; Rom 8:15f; Ephesi 2:8f; 1 Johana 3:1 )
5. Pathian thu chu kan nun kawng hruaitu a ni bawk. Hruaitu ropuite pawhin Pathian thu hmangin an kawng chu an titluang thin. ( Jisua 1:7-8) Ringtu mite ber pawhin Pathian thu hi kan lawmna bera hmang a, a chhun a zana kan ngaihtuah ( meditation) thin chuan kan thiltih apiang Lalpan min tihhmuingilsak thin. ( Sam 1:2-3, 119:105 )
6. Pathian thu hi kan taksa, rilru leh thlarau tan damna leh hriselna a ni. ( Sam 107:20; Jeremia 1:12; Isaia 55:11; Deuteronomy 30:14; Thufingte 18:21 ; Isaia 53:5 )
7. Pathian thu hi tawngtaina atan pawh hmang thin ang che. Tawngtai chham tur i hriat loh hunah pawh Pathian thu, Bible changte hmanga i tawngtai thin chuan tawngtai chham tur i haihchham tawh ngai lo vang. Ama tawngkam chhuak ngei hmanga Lalpa pawl chuan Lalpa a che tha duh hle a ni.
TLANGKAWMNA
Unau duh tak, hla siamtuin a sawi,
“Aw Baibul, Aw Baibul,
Ka ngai, ka thlahlel em e,
Aw Baibul, Aw Baibul,
Pathian Lehkhabu hi. “
tih hla hi, i nun chhungrila satu, Baibul thlahlel tak zettu i lo nih theih nan, Lalpan a thu malsawm rawh se.
( Amen)
